— Երկրորդի առկայությունը պարտադիր չէ, սկզբից հաշտվեք ձեր ներկայության հետ, որ հետո հաշտվողից հետազոտող դաստիրակեք։
— Մենք նախատեսված ենք խմբերով ապրելու համար, բայց ինքնորոշման և ազատագրման ճանապարհը միայն մենակ է հնարավոր անցնել։
— Եթե դուք ինքներդ ձեզ չեք հերիքում, ապա ուրիշն էլ ձեզ չի հերիքելու։
— Երկրորդը ձեզ չի պատկանում, սկի դուք ձեզ չեք պատկանում, պատկանելությունը միֆական հարաբերություն է։
— Հարաբերությունները միասին անցնելիք ճանապարհ է, ոչ թե միմյանց պատկերացումներին համապատասխանելու ստուգարք։
— Ճանապարհը ժամանակի ու տարածության մեջ տեղաշարժ չէ, ճանապարհը մեր անխուսափելի և անդառնալի տրանսֆորմացիաներն են․ եթե ձեզ ու ուղեկցին ուշադիր չզննեք ընթացքում, մի օր կտեսնեք, որ երկու տարբեր մարդիկ են իրար հետ, որոնցից երկուսին էլ չեք ճանաչում։
— Ինչ-որ պահից սկսած ցանկացած հարաբերության վերջը դառնում է կանխորոշված, դրա համար պետք է սովորել անընդհատ նորից սկսել, հատկապես նույն մարդու հետ, որովհետև նոր մարդու հետ շատ ավելի սկզբից եք սկսելու, չնայած էդ մեկը հանգամանքների ու հավեսի հարց է։
— Երկու հոգին միավորվում են ստեղծելու բաներ, որ միայն երկու հոգով է հնարավոր ստեղծել։
— Կարելի է իմաստավորել, ռոմանտիզացնել և բացարձականացնել հարաբերությունների զգայական կողմը՝ կտրելով բազմանալու անհրաժեշտության համատեքստից, բայց մի մոռացեք, որ այդ թմրեցնող քիմիան բնությունը նախատեսել է բազմանալուն հարակից ցավերը մեղմելու համար, ինքն իր հարցերն է լուծում, դուք միջոց եք, մի գերագնահատեք ձեր ընտրության ազատությունը, խոնարհությամբ ընդունեք այդ հանձնառությունը։
— Երկուսի միությունը սեռականությունից դուրս ավելի մեծ չքնաղություններ ունի պահած։
— Բայց եթե մի օր ամեն ինչ սկսում է տառապանքի վերածվել, պետք չի անցնել դիմանալու և գոյատևման կուռ ռեժիմին, եթե անգամ ուժեղ եք, եթե էդքան ուժեղ եք տառապանքի և դիմանալու համար, ապա ինչո՞ւ չդնել այդ ճիգը ավելի հետաքրքիր փորձառության, ասենք բարօրության կերտման վրա։ Այն ինչի հետ դուք նույնականացնում եք ձեզ և ընդունում իբրև անխուսափելի ճակատագիր՝ ընդամենը պատահական սննդի, գաղափարների, մարդկանց, տեղանունների ու հանգամանքների բերումով կուտակված ինքնություն է, այդ դուք չեք։ Իսկ ո՞վ եք դուք։ Սկսեք նորից կարդալ առաջին պատգամները։
