Ուրիշի երազում գոյանալու հմայիլ:
Սրանով մի երազի տևողությամբ հնարավոր է հաղթահարել տարածությունն ու ժամանակը՝ սիրելիի երազում հայտնվելու համար, երբ նա անհաղթահարելի հեռվում է կամ անհասանելի անցյալում: Չնայած քո՝ երազվողիդ կամոք, բայց հնարավոր է գոյանալ միայն իր՝ երազողի անցյալ և ապառնի հիշողության մարմինն առած: Իր համար այս հայտնությունը անհուն երանություն կլինի՝ թե՛ վայրի խոզի պատկերով լինես, թե՛ մերկ հրեշտակի. հայտնության ձևածումը չափազանց անկանխատեսելի է, և, ուրեմն, մոռացիր մարմինը և նոսրացիր առ է և պատրաստ եղիր թե՛ արյունահեղության, թե՛ սերմնահեղության:
Հազար տարվա մեռելի տապանակին պետք է նույն առավոտվա ցող շաղել, հետո նույն երեկոյի շաղ ցողել, հետո-հետո՝ կարմիր փետով խառնել հուր հեր կուռակը, վրան աստղափոշի ցանել, հետո էլի ծանել նույնի հակառակը, եթե հմայիլն ընթերցելիս ավելի շուտ քամին քամի ցողը, քան արևն ուտի շողը, ամեն ինչ կստացվի:
Դու՝ ծովում ներծծված աստված.
ցանկալի-անհաղորդ ինչպես սիրելիի դին – առկա,
ինչպես անապատի փոշին հյուսիսի անձրևում –
քե՛զ եմ բարևում, քե՛զ եմ բարևում:
Ամեն ինչ կրկնվում է խոսացվածի պես –
բրոնզե, ինչպես բանաստեղծի հետմահու փառքը
ու նորից, ինչպես սերմը սերմից,
արձակիր ինքնիրեն շերտաճած ժամանակը
ու ինձ ներ-ներշնչիր շեմից:
Ամեն ինչ վերադառնում է երազվածի պես –
բույրը, որով դեղձի այգին մերկանում է հարսի շորից,
գույնը, որով արևը ծիկրակում է գիշերվա վերմակի տակ,
շունչը, որով դաղձի հոգին հարություն է առնում թուրմից,
պահը, երբ հողը մինուճար սերմ է գտնում մտքում,
համը, որում գինին ու մեղրը համբույրով խառնվում են:
Խառնիխուռնվում են մինչն ու հետոն,
նախապատրաստվում են:
Մարմինն ավելի շուտ է ծնվում, քան իր անունը
և ավելի շուտ է մեռնում, որովհետև անհունը
միասեռ է, ինքն իր հետ ընթակա, անգամ
գիշերակացի կղզյակներ չի հանդուրժում
խավարում կորած ձկնորսների համար,
ոչնչի հետ նույնական,
չար ու չկամ
ամենայն տաքի հանդեպ:
Էությունը մեռնելու մարմին է փնտրում, ինչպես
իր անուն ազգանունին սպասող նորածինն ու իր
սերմնացանի ցանին սպասող հողն ու
իր թագավորի մահվանը սպասող ժողովուրդը:
Հասած մարմինը տրվում է անայլընտրանք:
Քառասուն գարուն անց մի կյանք,
հինգ ծովակ անց վեց քարափ ու
կեսգիշերն անց քառորդ լուսին
մենք միասին ենք,
մի-ա-սին:
