Նոյեմբերի 19-ին Բեռլինում կայացավ իմ մաեստրո պապիկի` Տիգրան Մանսուրյանի Ռեքվիեմի համաշխարհային պրեմիերան: Այն կատարեցին հանրահայտ ՌԻԱՍ կամերային երգչախումբը և Մյունխենի կամերային նվագախումբը՝ Ալեքսանդր Լիբրայխի ղեկավարությամբ: Առաջիկա օրերին ռեքվիեմը կկատարվի Գերմանիայի ևս մի քանի քաղաքներում:
Ինչպես մեկնելուց առաջ Նարեկացի կենտրոնում ռեքվիեմի մասին փոքրիկ դասախոսություն-շնորհանդեսի ժամանակ ասաց մաեստրոն` նա ռեքվիեմը գրել է այն թաքուն փափագով, որ եթե հանկարծ մի օր եվրոպացիները որոշեն հիշատակել հայոց ցեղասպանության զոհերին, ապա դիմեն «իրենց հասկանալի լեզվով» այս ստեղծագործությանը: Ռեքվիեմը նվիրվում է ցեղասպանության զոհերի հիշատակին, գրված է ժանրի կանոնների խստագույն պահպանմամբ – այսինքն ավանդական լատիներեն տեքստի վրա, բայց մեղեդային լուծումներով` առավել քան հայկական է:
Բայց մինչ Եվրոպան վայելում էր մեծ երաժիշտի գլուխգործոցը, պատշաճ ուշադրությամբ նրան արժանին մատուցելով իր հանճարի համար, այս փոքրիկ, թշվառ ու խեղճ «երկիրը» շարունակում էր մտահոգ մնալ իր թշվառ ու խեղճ խնդիրներով և իշխանական, ընդդիմադիր, պաշտոնական և անպաշտոն լրահոսում հատուկենտ տեղեկանքներ հայտնվեցին այս իրադարձության մասին:
Տիգրան Մանսուրյանը ստեղծել է մի բան, որով հպարտանալու առիթ պիտի ունենան հայ լինելու մտքի հետ համակերպված մարդիկ` որ ժամանակում էլ որ դա լինի, այսուհետ…
Մաեստրոյի իսկական երկրպագուների համար տեղադրում եմ Ռեքվիեմի առցանց հեռարձակման իմ կատարած (ցանցահեն) ձայնագրությունը:
Ահա Ռեքվիեմի թանկագին հղումը:
(եթե բեռնելու հետ կապված խնդիրներ լինեն, գրեք ինձ karen_antashyan@yahoo.com)
